စပါးတွေ ပိုထွက်ဖို့၊ ပိုတက်(ရှ်) သုံးကြစို့

ခုလတ်တလောမှာ ပိုးမွှားကျရောက်မှုတွေအကြောင်းကို ဦးစားပေးပြီး တင်ဖြစ်ခဲ့ရာကနေ ပိုးမွှား၊ရောဂါကျရောက်မှုဒဏ်ကို ခံနိုင်ရည်ရှိစေမယ့် ပိုတက်(ရှ်) မြေသြဇာ အသုံးပြုဖို့ကိုလည်း တိုက်တွန်းဖြစ်ခဲ့ပါတယ်။ ခုနောက်ပိုင်း ဓာတ်မြေသြဇာ ထုတ်လုပ်မှုတွေများလာသလို၊ တံဆိပ်တွေကလည်း များလာခဲ့တာမို့ တောင်သူတွေအနေနဲ့ မှတ်ရခက်မယ်လို့ ထင်ပါတယ် ခင်ဗျ။ ဒါကြောင့် စပါးအတွက် မရှိမဖြစ်လိုအပ်တဲ့ အများလို အဟာရထဲက (၁)ခုဖြစ်တဲ့ ပိုတက်(ရှ်)ရဲ့ ကောင်းကျိုး အာနိသင်တွေနဲ့ အသုံးပြုပုံတွေကို ထပ်မံ မျှဝေလိုက်ရပါတယ် ခင်ဗျာ

ပိုတက်(ရှ်) ဆိုတာ ဘာလဲ

=================

အပင်အတွက် လိုအပ်တဲ့ အာဟာရဓာတ်တွေထဲက တစ်မျိုးဖြစ်ပါတယ်။ သူ့ရဲ့ အမည်အမှန်ကတော့ ပိုတက်စီယမ် (Potassium) ဖြစ်ပြီး ပိုတက်(ရှ်)လို့ အခေါ်များကြပါတယ်။

ပိုတက်(ရှ်) ဟာ သီးနှံပင်တွေ ကြီးထွားဖွံ့ဖြိုးဖို့ လိုအပ်တဲ့ပမာဏ များတဲ့အတွက် အဓိကအများလို အာဟာရဓာတ်ထဲမှာ ထည့်သွင်းထားကြပါတယ်။ အခြားအများလို အာဟာရတွေကတော့ နိုက်ထရိုဂျင် (Nitrogen) နဲ့ ဖော့စဖိတ် (Phosphorus) ဖြစ်ပါတယ်။

အပင်တွေအတွက် ပိုတက်(ရှ်) ရဲ့ လုပ်ဆောင်ချက်

===============================

ပိုတက်(ရှ်) ဟာ အပင်ယိုင်လဲမှုမှ ကာကွယ်ပေးတယ်။ ပိုးမွှား၊ ရောဂါဒဏ်ကို ခံနိုင်ရည်ရှိစေတယ်လို့ လူသိများကြပါတယ်။ လူသိနည်းသေးတဲ့ ပိုတက်(ရှ်) ရဲ့ အခြားဂုဏ်သတ္တိတွေကတော့ -

အမြစ်ကြီးထွားမှုကို အားပေးပြီး အပင်ကို ကျန်းမာတောင့်တင်းစေတယ်။

ပင်ပွားထွက်မှုကို အားပေးပြီး အစာချက်လုပ်မှုကို အားကောင်းစေတယ်။

အောင်စေ့ရာခိုင်နှုန်းများစေပြီး အစေ့အလေးချိန်ကို တိုးစေပါတယ်။

ဆိုးဝါးတဲ့ ရာသီဥတု အခြေအနေတွေကို အတော်အသင့် ခံနိုင်ရည်ရှိစေတယ်။

ဘယ်အချိန်မှာ ထည့်သွင်းရမလဲ

=====================

ပိုတက်(ရှ်) မြေသြဇာ ထည့်သင့်တဲ့အချိန်တွေကတော့ မြေခံချိန်နဲ့ မှို့ကပ်ချိန်တွေပဲ ဖြစ်ပါတယ်။ မြေခံမှာ မထည့်ထားဖြစ်ခဲ့ဘူးဆိုရင်တော့ မှို့ကပ်ချိန်မှာ မဖြစ်မနေ ထည့်ဖို့ မမေ့ပါနဲ့နော်။

ဘယ်လောက်ထည့်ရမလဲ

=================

တစ်ဧကကို အိတ်ဝက်မှ တစ်အိတ်အထိ သုံးနိုင်ပါတယ်။ မိမိသုံးလိုတဲ့ ပိုတက်(ရှ်)ပမာဏကို (၂)ပိုင်းခွဲပြီး မြေခံမှာ (၁)ပိုင်းနဲ့ ကျန်(၁)ပိုင်းကို မှို့ကပ်ချိန်မှာ သုံးနိုင်ပါတယ်။

အသုံးနည်းနေသေးတဲ့ ပိုတက်(ရှ်) ထည့်သွင်းခြင်းဖြင့် သီးနှံတွေ ပိုထွက်နိုင်ကြပါစေ။

---------------------------------------------------------

မူရင်း@ရေတံခွန် တောင်သူပညာပေးအဖွဲ့